آلینان بیلگیلره گؤره میللی فعال، بیلی‌یۇردو اؤگرتمنی (اونیوئرسیته اۇستادی)، بیلگی‌سایار مۆهندیسی، علیرضا فرشی یئنی تحصیل ایلی باشلاماسیلا جولفا آزاد بیلی‌یۇردو رییسی‌نین قرارینا دایاناراق ایخراج اوْلونوب. بۇ اوْ حالدا اوْلور کی بیلی‌یوردو رییسینین قانونٲ بو ایشه یئتگیسی یوخدور.

فاطمه نصیرپور، «آذربایجان قادینی» آدلی اؤیرنجی درگیسینین باش یازاری و «آرمان» آدلی قاپاتیلمیش اؤیرنجی قۇرولوشونون اۆیه‌سی مرندین اینقیلاب محکمه‌سی طرفیندن آلتی آی حبسه محکوم اوْلدو.

ایطیلاعات باخانلیغینین مامورلاری تبریزین یاشیل لاری و ایصلاحچی‌لاریله تاماسلاشیب، تۇتوب باسدیرما تهدیدیله اوْنلاری فیطر نامازی مراسیمی گئچیرمه‌دن منع ائتدیلر.

ایکی تانیلمیش روحانی‌نین بیت‌لری ساتاشقانلار و تالانچیلارین حمله‌لرینه معروض قالدیلار. بۇ اوْباش تهراندا یاشیل لیدری مهدی کروبی و شیرازدکی مرجع آیت الله دستغیبین ائو و مسجیدلرینه یۆگوروب قوْرخوتماق مانئوری گئچیرتدیلر.

رسا، ایران یاشیل حرکتینین تئلئوئزیاسی اۇیدو (ساتئلیت) طریقیله یایینین باشلادی. بۇندان اؤنجه مشروطه گۆنویله یاناشی رسا اینترنت یایینین باشلامیشدی و بۇگون شهریورین اوْنوندان اۇیدو یایینین (پخش ماهواره‌ای) باشلادی.

ابوالحسن بنی صدر، ایران ایسلامی جومهوریتینین ایلک باشقانی دئییر موسوی رژیم دن بیلدیغی سیررلری اوْ جۇمله‌دن ۱۳۶۷- جی ایلده سیاسی تۇتوقلولارلا باغلی معلوماتی آچماق ایسترسه اؤلدوروله بیلر.

بیرلشمیش میللتلرین ایٛرقسال آیری سئچگیلیغی قالدیرما کوْمیته‌سی (کمیته رفع تبعیض نژادی سازمان ملل متحد) ایراندا قومیتلر علیهینه آیری سئچگیلیغی قایغیلاندیریجی بیلیب. بۇ کوْمیته‌نین راپوْرتوندا آذربایجانلیلار، عربلر، کۆردلر، بلۇچلار و بهاییلارین ائگیتیم (تحصیل)، ساغلاملیق (بهداشت) ایش و ائودن فایدالانماق وضع لری نیگاران ائدیجی بیلدیریلیب.