ایرانین یاشیل حرکتی، ۱۳۸۸ - جی ایلین سئچگی لرینده اوْلان حاقسیزلیقدان سوْنرا، بیر دموکراسی و اینسان حاقلاری ایستهین حرکت کیمی دوْغولدو. چئشیدلی سلیقهلی و ایستکلی اینسانلار بو حرکته قاتیلدی اما دئمک اوْلار اؤلکهنی دموکراسی و اینسان حاقلارینا ساری یؤنتمک بو چالیشانلاری بیر بیرینه باغلایان تسبئح باغیدیر. بئله اوْلورسا اتنیک گروپلارین حاقلاری و ایستکلری بو حرکتین ایستکلریندن اوْلمالیدیر. بو ایستکلرین ایچینده خۇصوصیتله آنا دیلینه عایید اوْلان حاقلاری قئید ائتمک اوْلار. ایران تۆرکلرینین اۆرکلری ایللردیر آنا دیلی دئیه چیٛرپینیر و اوْنون قوْرولماسین و مدرسهلرده اؤگردیلمهسین ایستهییر. بو گرچکلره باخاراق، بیز آزادلیغین یاشیل سسی گۆروپوندا آذربایجان تۆرکجهسینده یازماق قرارینا گلدیک. تۆرکجه بؤلومونده یاشیل حرکاتینا و داها عۇمومیتله ایراندا آزادلیق و اینسان حاقلارینا عایید اوْلان اؤنملی خبرلری پایلاشاجاغیق.
خبرلر، مقاله لر و نظرلرینیزی بیزه گؤندرین. یازیلار عرب کؤکلو تۆرک الیفباسیندا اوْلوب، تهراندا گئچیریلن اوْرتوقرافی سمینارلارینین ایستانداردلارینا اۇیغون اولمالیدیرلار.
اۇموروق بیزیم بو کؤچوک آددیمیمیز، ایراندا قومیتلر آراسیندا آنلاشمایا یاردیم ائدیب هامیمیزی داها آرتیق برابرلیق و آزادلیغا یاخینلادا. یاشاسین آذربایجان. یاشاسین آزاد ایران.